O Lexicón Freático----Volume 1. Trienal de Sarria

A Trienal Sarria presenta O Lexicón Freático — Volume 1 en A Sede – NDAC

A Trienal Sarria inaugura o próximo 18 de abril de 2026, ás 19.00 h, en A Sede – NDAC, a exposición colectiva O Lexicón Freático — Volume 1, con traballos de Bárbara da Fonte, Clo Plas, João Vasco Paiva, Salvador Cidrás e Víctor.
A mostra reúne un conxunto de artistas de traxectoria sólida e perfís moi diferenciados, o que lle dá ao bloque unha densidade de partida pouco habitual. Entre eles figuran os artistas portugueses Bárbara da Fonte e João Vasco Paiva, cuxas prácticas amplían o alcance do proxecto desde un diálogo directo co contexto luso. Xunto a eles, Salvador Cidrás, figura destacada da arte contemporánea galega, Clo Plas, cunha liña de traballo singular ligada ao son, á percepción e á duración, e Víctor, cuxo papel resulta central na dimensión material e editorial do proxecto, conforman unha constelación de posicións cunha forte capacidade de interlocución.
Lonxe de ilustrar unha publicación previa, as obras reunidas activan o Lexicón como estrutura en uso e prolongan no espazo expositivo a súa lóxica conceptual e material. O proxecto articúlase así desde rexistros complementarios ligados ao corpo, o territorio, a percepción, o coidado, o oficio e as condicións de aparición das obras.
No centro da proposta sitúase tamén a publicación O Lexicón Freático — Volume 1, realizada mediante impresión tradicional con tipografía móbil de chumbo. Exposición e libro comparten así unha mesma estrutura de pensamento, composición e circulación, reforzando a relación entre edición, exposición e contexto.

A xornada de apertura contará coa presenza dos artistas, a presentación da publicación, unha performance de Bárbara da Fonte e unha actuación de Clo Plas.
A inauguración terá lugar en A Sede – NDAC, na Rúa Ramón Cabanillas 11, Nave 5, Sarria. Entrada libre.